איוב — תנ״ך

איוב

תנ״ך · License: CC BY 4.0 (OSHB/WLC) · Source

• איש היה בארץ עוץ איוב שמו והיה האיש ההוא תם וישר וירא אלהים וסר מרע Job.1.1
• ויולדו לו שבעה בנים ושלוש בנות Job.1.2
• ויהי מקנהו שבעת אלפי צאן ושלשת אלפי גמלים וחמש מאות צמד בקר וחמש מאות אתונות ועבדה רבה מאד ויהי האיש ההוא גדול מכל בני קדם Job.1.3
• והלכו בניו ועשו משתה בית איש יומו ושלחו וקראו לשלשת אחיתיהם לאכל ולשתות עמהם Job.1.4
• ויהי כי הקיפו ימי המשתה וישלח איוב ויקדשם והשכים בבקר והעלה עלות מספר כלם כי אמר איוב אולי חטאו בני וברכו אלהים בלבבם ככה יעשה איוב כל הימים Job.1.5
• ויהי היום ויבאו בני האלהים להתיצב על ה׳ ויבוא גם השטן בתוכם Job.1.6
• ויאמר ה׳ אל השטן מאין תבא ויען השטן את ה׳ ויאמר משוט בארץ ומהתהלך בה Job.1.7
• ויאמר ה׳ אל השטן השמת לבך על עבדי איוב כי אין כמהו בארץ איש תם וישר ירא אלהים וסר מרע Job.1.8
• ויען השטן את ה׳ ויאמר החנם ירא איוב אלהים Job.1.9
• הלא את שכת בעדו ובעד ביתו ובעד כל אשר לו מסביב מעשה ידיו ברכת ומקנהו פרץ בארץ Job.1.10
• ואולם שלח נא ידך וגע בכל אשר לו אם לא על פניך יברכך Job.1.11
• ויאמר ה׳ אל השטן הנה כל אשר לו בידך רק אליו אל תשלח ידך ויצא השטן מעם פני ה׳ Job.1.12
• ויהי היום ובניו ובנתיו אכלים ושתים יין בבית אחיהם הבכור Job.1.13
• ומלאך בא אל איוב ויאמר הבקר היו חרשות והאתנות רעות על ידיהם Job.1.14
• ותפל שבא ותקחם ואת הנערים הכו לפי חרב ואמלטה רק אני לבדי להגיד לך Job.1.15
• עוד זה מדבר וזה בא ויאמר אש אלהים נפלה מן השמים ותבער בצאן ובנערים ותאכלם ואמלטה רק אני לבדי להגיד לך Job.1.16
• עוד זה מדבר וזה בא ויאמר כשדים שמו שלשה ראשים ויפשטו על הגמלים ויקחום ואת הנערים הכו לפי חרב ואמלטה רק אני לבדי להגיד לך Job.1.17
• עד זה מדבר וזה בא ויאמר בניך ובנותיך אכלים ושתים יין בבית אחיהם הבכור Job.1.18
• והנה רוח גדולה באה מעבר המדבר ויגע בארבע פנות הבית ויפל על הנערים וימותו ואמלטה רק אני לבדי להגיד לך Job.1.19
• ויקם איוב ויקרע את מעלו ויגז את ראשו ויפל ארצה וישתחו Job.1.20
• ויאמר ערם יצתי מבטן אמי וערם אשוב שמה ה׳ נתן וה׳ לקח יהי שם ה׳ מברך Job.1.21
• בכל זאת לא חטא איוב ולא נתן תפלה לאלהים Job.1.22
• ויהי היום ויבאו בני האלהים להתיצב על ה׳ ויבוא גם השטן בתכם להתיצב על ה׳ Job.2.1
• ויאמר ה׳ אל השטן אי מזה תבא ויען השטן את ה׳ ויאמר משט בארץ ומהתהלך בה Job.2.2
• ויאמר ה׳ אל השטן השמת לבך אל עבדי איוב כי אין כמהו בארץ איש תם וישר ירא אלהים וסר מרע ועדנו מחזיק בתמתו ותסיתני בו לבלעו חנם Job.2.3
• ויען השטן את ה׳ ויאמר עור בעד עור וכל אשר לאיש יתן בעד נפשו Job.2.4
• אולם שלח נא ידך וגע אל עצמו ואל בשרו אם לא אל פניך יברכך Job.2.5
• ויאמר ה׳ אל השטן הנו בידך אך את נפשו שמר Job.2.6
• ויצא השטן מאת פני ה׳ ויך את איוב בשחין רע מכף רגלו עד קדקדו Job.2.7
• ויקח לו חרש להתגרד בו והוא ישב בתוך האפר Job.2.8
• ותאמר לו אשתו עדך מחזיק בתמתך ברך אלהים ומת Job.2.9
• ויאמר אליה כדבר אחת הנבלות תדברי גם את הטוב נקבל מאת האלהים ואת הרע לא נקבל בכל זאת לא חטא איוב בשפתיו Job.2.10
• וישמעו שלשת רעי איוב את כל הרעה הזאת הבאה עליו ויבאו איש ממקמו אליפז התימני ובלדד השוחי וצופר הנעמתי ויועדו יחדו לבוא לנוד לו ולנחמו Job.2.11
• וישאו את עיניהם מרחוק ולא הכירהו וישאו קולם ויבכו ויקרעו איש מעלו ויזרקו עפר על ראשיהם השמימה Job.2.12
• וישבו אתו לארץ שבעת ימים ושבעת לילות ואין דבר אליו דבר כי ראו כי גדל הכאב מאד Job.2.13
• אחרי כן פתח איוב את פיהו ויקלל את יומו Job.3.1
• ויען איוב ויאמר Job.3.2
• יאבד יום אולד בו והלילה אמר הרה גבר Job.3.3
• היום ההוא יהי חשך אל ידרשהו אלוה ממעל ואל תופע עליו נהרה Job.3.4
• יגאלהו חשך וצלמות תשכן עליו עננה יבעתהו כמרירי יום Job.3.5

Next →Books of sayings