תהלים — תנ״ך

תהלים

תנ״ך · רישיון: CC BY 4.0 (OSHB/WLC) · מקור

• יאתיו חשמנים מני מצרים כוש תריץ ידיו לאלהים Ps.68.32
• ממלכות הארץ שירו לאלהים זמרו אדני סלה Ps.68.33
• לרכב בשמי שמי קדם הן יתן בקולו קול עז Ps.68.34
• תנו עז לאלהים על ישראל גאותו ועזו בשחקים Ps.68.35
• נורא אלהים ממקדשיך אל ישראל הוא נתן עז ותעצמות לעם ברוך אלהים Ps.68.36
• למנצח על שושנים לדוד Ps.69.1
• הושיעני אלהים כי באו מים עד נפש Ps.69.2
• טבעתי ביון מצולה ואין מעמד באתי במעמקי מים ושבלת שטפתני Ps.69.3
• יגעתי בקראי נחר גרוני כלו עיני מיחל לאלהי Ps.69.4
• רבו משערות ראשי שנאי חנם עצמו מצמיתי איבי שקר אשר לא גזלתי אז אשיב Ps.69.5
• אלהים אתה ידעת לאולתי ואשמותי ממך לא נכחדו Ps.69.6
• אל יבשו בי קויך אדני ה׳ צבאות אל יכלמו בי מבקשיך אלהי ישראל Ps.69.7
• כי עליך נשאתי חרפה כסתה כלמה פני Ps.69.8
• מוזר הייתי לאחי ונכרי לבני אמי Ps.69.9
• כי קנאת ביתך אכלתני וחרפות חורפיך נפלו עלי Ps.69.10
• ואבכה בצום נפשי ותהי לחרפות לי Ps.69.11
• ואתנה לבושי שק ואהי להם למשל Ps.69.12
• ישיחו בי ישבי שער ונגינות שותי שכר Ps.69.13
• ואני תפלתי לך ה׳ עת רצון אלהים ברב חסדך ענני באמת ישעך Ps.69.14
• הצילני מטיט ואל אטבעה אנצלה משנאי וממעמקי מים Ps.69.15
• אל תשטפני שבלת מים ואל תבלעני מצולה ואל תאטר עלי באר פיה Ps.69.16
• ענני ה׳ כי טוב חסדך כרב רחמיך פנה אלי Ps.69.17
• ואל תסתר פניך מעבדך כי צר לי מהר ענני Ps.69.18
• קרבה אל נפשי גאלה למען איבי פדני Ps.69.19
• אתה ידעת חרפתי ובשתי וכלמתי נגדך כל צוררי Ps.69.20
• חרפה שברה לבי ואנושה ואקוה לנוד ואין ולמנחמים ולא מצאתי Ps.69.21
• ויתנו בברותי ראש ולצמאי ישקוני חמץ Ps.69.22
• יהי שלחנם לפניהם לפח ולשלומים למוקש Ps.69.23
• תחשכנה עיניהם מראות ומתניהם תמיד המעד Ps.69.24
• שפך עליהם זעמך וחרון אפך ישיגם Ps.69.25
• תהי טירתם נשמה באהליהם אל יהי ישב Ps.69.26
• כי אתה אשר הכית רדפו ואל מכאוב חלליך יספרו Ps.69.27
• תנה עון על עונם ואל יבאו בצדקתך Ps.69.28
• ימחו מספר חיים ועם צדיקים אל יכתבו Ps.69.29
• ואני עני וכואב ישועתך אלהים תשגבני Ps.69.30
• אהללה שם אלהים בשיר ואגדלנו בתודה Ps.69.31
• ותיטב לה׳ משור פר מקרן מפריס Ps.69.32
• ראו ענוים ישמחו דרשי אלהים ויחי לבבכם Ps.69.33
• כי שמע אל אביונים ה׳ ואת אסיריו לא בזה Ps.69.34
• יהללוהו שמים וארץ ימים וכל רמש בם Ps.69.35

חזרההלאה →ספרי אמרות