תהלים — תנ״ך

תהלים

תנ״ך · Άδεια: CC BY 4.0 (OSHB/WLC) · Πηγή

• כי לא אל חפץ רשע אתה לא יגרך רע Ps.5.5
• לא יתיצבו הוללים לנגד עיניך שנאת כל פעלי און Ps.5.6
• תאבד דברי כזב איש דמים ומרמה יתעב ה׳ Ps.5.7
• ואני ברב חסדך אבוא ביתך אשתחוה אל היכל קדשך ביראתך Ps.5.8
• ה׳ נחני בצדקתך למען שוררי הושר לפני דרכך Ps.5.9
• כי אין בפיהו נכונה קרבם הוות קבר פתוח גרונם לשונם יחליקון Ps.5.10
• האשימם אלהים יפלו ממעצותיהם ברב פשעיהם הדיחמו כי מרו בך Ps.5.11
• וישמחו כל חוסי בך לעולם ירננו ותסך עלימו ויעלצו בך אהבי שמך Ps.5.12
• כי אתה תברך צדיק ה׳ כצנה רצון תעטרנו Ps.5.13
• למנצח בנגינות על השמינית מזמור לדוד Ps.6.1
• ה׳ אל באפך תוכיחני ואל בחמתך תיסרני Ps.6.2
• חנני ה׳ כי אמלל אני רפאני ה׳ כי נבהלו עצמי Ps.6.3
• ונפשי נבהלה מאד ואת ה׳ עד מתי Ps.6.4
• שובה ה׳ חלצה נפשי הושיעני למען חסדך Ps.6.5
• כי אין במות זכרך בשאול מי יודה לך Ps.6.6
• יגעתי באנחתי אשחה בכל לילה מטתי בדמעתי ערשי אמסה Ps.6.7
• עששה מכעס עיני עתקה בכל צוררי Ps.6.8
• סורו ממני כל פעלי און כי שמע ה׳ קול בכיי Ps.6.9
• שמע ה׳ תחנתי ה׳ תפלתי יקח Ps.6.10
• יבשו ויבהלו מאד כל איבי ישבו יבשו רגע Ps.6.11
• שגיון לדוד אשר שר לה׳ על דברי כוש בן ימיני Ps.7.1
• ה׳ אלהי בך חסיתי הושיעני מכל רדפי והצילני Ps.7.2
• פן יטרף כאריה נפשי פרק ואין מציל Ps.7.3
• ה׳ אלהי אם עשיתי זאת אם יש עול בכפי Ps.7.4
• אם גמלתי שולמי רע ואחלצה צוררי ריקם Ps.7.5
• ירדף אויב נפשי וישג וירמס לארץ חיי וכבודי לעפר ישכן סלה Ps.7.6
• קומה ה׳ באפך הנשא בעברות צוררי ועורה אלי משפט צוית Ps.7.7
• ועדת לאמים תסובבך ועליה למרום שובה Ps.7.8
• ה׳ ידין עמים שפטני ה׳ כצדקי וכתמי עלי Ps.7.9
• יגמר נא רע רשעים ותכונן צדיק ובחן לבות וכליות אלהים צדיק Ps.7.10
• מגני על אלהים מושיע ישרי לב Ps.7.11
• אלהים שופט צדיק ואל זעם בכל יום Ps.7.12
• אם לא ישוב חרבו ילטוש קשתו דרך ויכוננה Ps.7.13
• ולו הכין כלי מות חציו לדלקים יפעל Ps.7.14
• הנה יחבל און והרה עמל וילד שקר Ps.7.15
• בור כרה ויחפרהו ויפל בשחת יפעל Ps.7.16
• ישוב עמלו בראשו ועל קדקדו חמסו ירד Ps.7.17
• אודה ה׳ כצדקו ואזמרה שם ה׳ עליון Ps.7.18
• למנצח על הגתית מזמור לדוד Ps.8.1
• ה׳ אדנינו מה אדיר שמך בכל הארץ אשר תנה הודך על השמים Ps.8.2

ΠίσωΕπόμενα →Βιβλία γνωμικών