תהלים — תנ״ך
SAPIR 861
תהלים
תנ״ך · Лицензия: CC BY 4.0 (OSHB/WLC) · Источник
- פני ה׳ בעשי רע להכרית מארץ זכרם Ps.34.17
- צעקו וה׳ שמע ומכל צרותם הצילם Ps.34.18
- קרוב ה׳ לנשברי לב ואת דכאי רוח יושיע Ps.34.19
- רבות רעות צדיק ומכלם יצילנו ה׳ Ps.34.20
- שמר כל עצמותיו אחת מהנה לא נשברה Ps.34.21
- תמותת רשע רעה ושנאי צדיק יאשמו Ps.34.22
- פודה ה׳ נפש עבדיו ולא יאשמו כל החסים בו Ps.34.23
- לדוד ריבה ה׳ את יריבי לחם את לחמי Ps.35.1
- החזק מגן וצנה וקומה בעזרתי Ps.35.2
- והרק חנית וסגר לקראת רדפי אמר לנפשי ישעתך אני Ps.35.3
- יבשו ויכלמו מבקשי נפשי יסגו אחור ויחפרו חשבי רעתי Ps.35.4
- יהיו כמץ לפני רוח ומלאך ה׳ דוחה Ps.35.5
- יהי דרכם חשך וחלקלקות ומלאך ה׳ רדפם Ps.35.6
- כי חנם טמנו לי שחת רשתם חנם חפרו לנפשי Ps.35.7
- תבואהו שואה לא ידע ורשתו אשר טמן תלכדו בשואה יפל בה Ps.35.8
- ונפשי תגיל בה׳ תשיש בישועתו Ps.35.9
- כל עצמותי תאמרנה ה׳ מי כמוך מציל עני מחזק ממנו ועני ואביון מגזלו Ps.35.10
- יקומון עדי חמס אשר לא ידעתי ישאלוני Ps.35.11
- ישלמוני רעה תחת טובה שכול לנפשי Ps.35.12
- ואני בחלותם לבושי שק עניתי בצום נפשי ותפלתי על חיקי תשוב Ps.35.13
- כרע כאח לי התהלכתי כאבל אם קדר שחותי Ps.35.14
- ובצלעי שמחו ונאספו נאספו עלי נכים ולא ידעתי קרעו ולא דמו Ps.35.15
- בחנפי לעגי מעוג חרק עלי שנימו Ps.35.16
- אדני כמה תראה השיבה נפשי משאיהם מכפירים יחידתי Ps.35.17
- אודך בקהל רב בעם עצום אהללך Ps.35.18
- אל ישמחו לי איבי שקר שנאי חנם יקרצו עין Ps.35.19
- כי לא שלום ידברו ועל רגעי ארץ דברי מרמות יחשבון Ps.35.20
- וירחיבו עלי פיהם אמרו האח האח ראתה עינינו Ps.35.21
- ראיתה ה׳ אל תחרש אדני אל תרחק ממני Ps.35.22
- העירה והקיצה למשפטי אלהי ואדני לריבי Ps.35.23
- שפטני כצדקך ה׳ אלהי ואל ישמחו לי Ps.35.24
- אל יאמרו בלבם האח נפשנו אל יאמרו בלענוהו Ps.35.25
- יבשו ויחפרו יחדו שמחי רעתי ילבשו בשת וכלמה המגדילים עלי Ps.35.26
- ירנו וישמחו חפצי צדקי ויאמרו תמיד יגדל ה׳ החפץ שלום עבדו Ps.35.27
- ולשוני תהגה צדקך כל היום תהלתך Ps.35.28
- למנצח לעבד ה׳ לדוד Ps.36.1
- נאם פשע לרשע בקרב לבי אין פחד אלהים לנגד עיניו Ps.36.2
- כי החליק אליו בעיניו למצא עונו לשנא Ps.36.3
- דברי פיו און ומרמה חדל להשכיל להיטיב Ps.36.4
- און יחשב על משכבו יתיצב על דרך לא טוב רע לא ימאס Ps.36.5
Open Scriptures Hebrew Bible (WLC), CC BY 4.0